Almaty Management University-де студенттер мен қаржы нарығы сарапшыларын біріктірген «Бағалы қағаздар нарығындағы қаржы технологиялары» тақырыбында білім беру семинары өтті.

Іс-шара барысында Fingramota.kz жобасының сарапшысы Ғаділбек Әкім Қазақстанның қаржы жүйесінің жұмыс істеуі, оның қатысушыларының құқықтары мен міндеттері және қаржылық сауаттылықты арттыру мүмкіндіктері туралы айтты. Сондай-ақ дропперлік тәуекелдерге, заңнамадағы соңғы өзгерістерге және сенімді ақпарат көздеріне ерекше назар аударылды.

Valor Capital брокерлік компаниясы директорлар кеңесінің мүшесі, қаржыгер Иван Сердюк «Қазақстан облигациялар нарығында бүгінде табыс табуға бола ма?» атты таныстырылым жасады. Спикер нарықтың қалыптасу кезеңдеріне, қазіргі жағдайына, инвесторлар үшін мүмкіндіктерге және әрі қарай даму перспективаларына жан-жақты тоқталды.

KASE Academy жетекшісі Абылай Сыздықов «Биржалық инфрақұрылым эволюциясы: цифрлық активтер платформаларына көшу» тақырыбында баяндама жасап, токенизацияның дамуы, Қазақстандағы және әлемдегі цифрлық активтер, сондай-ақ бағалы қағаздар нарығына жаңа технологиялардың енгізілуі туралы айтып өтті.

Семинар қаржылық сауаттылықты арттыруға бағытталған білім беру кездесулерінің бір бөлігі болды.

Өзекті жаңалықтарды бақылап, Fingramota.kz-пен бірге қаржылық біліміңізді арттырыңыз!