Алматы, 2025 жылғы 23 сәуір — Алматы энергетика және байланыс университетінде (АЭжБУ) Isker Isiәлеуметтік жобасы аясында «Қаржылық сауаттылық: өзіңді алаяқтықтан, нашақорлықтан және лудоманиядан қалай қорғауға болады» тақырыбында дәріс өтті.

Іс-шараға Қазақстан Республикасы Қаржы нарығын реттеу және дамыту агенттігінің Fingramota.kz жобасы, Алматы қаласы прокуратурасы, Almaty Creative ұйымы, сондай-ақ АЭжБУ профессорлық-оқытушылық құрамы қатысты.

Fingramota.kz жобасының атынан қаржылық технологиялар саласының сарапшысы, «КазФинТех» заңды тұлғалар бірлестігінің жетекшісі Алексей Сидоров сөз сөйледі. Ол өз баяндамасында қазіргі таңда кең таралған қаржылық алаяқтық схемаларына, соның ішінде «дропперлікке» тоқталып, бұл құбылыстың әсіресе жастар үшін қаншалықты қауіпті екенін түсіндірді.

Дәріс барысында келесі маңызды тақырыптар қарастырылды:

• цифрлық қауіпсіздік және жеке деректерді қорғау;

• фишинг, әлеуметтік инженерия және жалған инвестициялық ұсыныстар;

• артық несиелендірудің себептері мен салдары;

• қаржылық тұрақтылықтың негізгі қағидаттары.

Сондай-ақ, жастарды заңсыз схемаларға тартудың алдын алу және жеке қаржыны басқаруға деген саналы көзқарас қалыптастыру мәселелеріне ерекше назар аударылды.

Іс-шараға университеттің 100-ден астам студенті қатысты.

Осындай дәрістер жастар арасында қаржылық және құқықтық сауаттылықты арттырып қана қоймай, оларды киберқауіптер мен әлеуметтік тәуекелдерден қорғауға ықпал етеді.