Алматы, 2025 жылғы 18 сәуір — Алматы қаласындағы коммуналдық қызмет көрсету кәсіпорындарының базасында «Қаржылық сауаттылық: өзіңді алаяқтық схемалардан қалай қорғауға болады» тақырыбында дәріс өтті. Іс-шара Isker Isi әлеуметтік жобасы аясында, Қазақстан Республикасының Қаржы нарығын реттеу және дамыту агенттігі жанындағы Fingramota.kz жобасының қолдауымен ұйымдастырылды.

Іс-шараның мақсаты — коммуналдық сала қызметкерлерінің қаржылық сауаттылық деңгейін арттыру, жеке қаражатты қорғау бойынша практикалық құралдар ұсыну және қазіргі қаржылық тәуекелдер жағдайында отбасылық бюджетті тиімді басқаруға үйрету.

Дәріс барысында Fingramota.kz жобасының өкілі, қаржы сарапшысы және бизнес-тренер Жандос Брасилов сөз сөйледі. Ол кең таралған қаржылық алаяқтық схемалары, соның ішінде «дропперлік» туралы жан-жақты ақпарат беріп, мұндай әрекеттердің азаматтар үшін, әсіресе құқықтық және цифрлық сауаттылығы төмен адамдар үшін қаншалықты қауіпті екенін атап өтті.

Дәрісте келесі маңызды тақырыптар қозғалды:

• цифрлық қауіпсіздік шаралары және жеке деректерді қорғау;

• мерзімі өткен берешекті реттеу құралдары;

• артық несие жүктемесінің себептері мен салдары;

• теңгерімді бюджет құру және қаржылық жоспарлау негіздері.

Кездесу барысында тыңдаушылар тарапынан ерекше қызығушылық тудырған — нақты алаяқтық схемалар мысалында ұсынылған практикалық кейстер болды. Спикер әрбір жағдайды кезең-кезеңімен талдап, қандай әрекет ету алгоритмін ұстану керектігін түсіндірді. Қатысушылар белсенді түрде сұрақтар қойып, жеке тәжірибелерімен бөлісті және нақты ұсынымдар алды.

Ашық диалог форматындағы дәріс тыңдаушылар үшін пайдалы әрі интерактивті өтті. Мұндай іс-шаралар азаматтардың қаржылық дағдыларын нығайтып қана қоймай, оларды киберқауіптерден, заңсыз ұсыныстардан және шамадан тыс қарыз жүктемесінен қорғауға ықпал етеді.

Fingramota.kz жобасы халықтың әртүрлі әлеуметтік топтары арасында қаржылық сауаттылықты арттыру, жауапты қаржылық мінез-құлық мәдениетін дамыту және азаматтардың қаржылық құқықтары мен мүмкіндіктері туралы қолжетімді ақпарат ұсыну жұмыстарын жалғастыруда.