2026 жылғы 15 мамырда Тұран университеті Қазақстанның түкпір-түкпірінен келген үздік қаржы мамандығының студенттерін біріктіріп, «Қаржы» білім беру бағдарламасы бойынша XVIII республикалық студенттік пәндік олимпиаданы өткізді. Зияткерлік алаңның тақырыбы — «Болашақ қаржысы: ұлттық экономиканы дамытудың жаңа мүмкіндіктері мен сын-қатерлері».

Республикалық деңгейдегі іс-шара ҚР Қаржы нарығын реттеу және дамыту агенттігінің Fingramota.kz жобасы аясында және Қазақстан Республикасы Ғылым және жоғары білім министрлігінің қолдауымен ұйымдастырылды.

Олимпиадаға Қазақстанның 12 жетекші жоғары оқу орнының өкілдері қатысты. Күн бойы қатысушылар кәсіби дайындық деңгейін, аналитикалық ойлау қабілетін, көшбасшылық қасиеттерін және командада тиімді жұмыс істеу дағдыларын көрсетті.

Жарыс бағдарламасы бірнеше кезеңнен тұрды: кәсіби құзыреттер бойынша кешенді тестілеу, капитандардың «Finance IQ» зияткерлік блиці, сондай-ақ ғылыми-зерттеу жобаларын қорғау.

Олимпиада қорытындысы бойынша жүлделі орындар келесідей бөлінді:
I орын — Қазтұтынуодағы Қарағанды университеті
II орын — Абай Мырзахметов атындағы Көкшетау университеті
II орын — Almaty Management University
III орын — М. Әуезов атындағы Оңтүстік Қазақстан зерттеу университеті
III орын — А. Қ. Құсайынов атындағы Еуразиялық гуманитарлық институт
III орын — «Тұран» университеті

Қазылар алқасының құрамына «Halyk Bank» АҚ, «Отбасы банк» АҚ, «Altyn Bank» АҚ (China CITIC Bank Corporation Ltd еншілес банкі), «KMF-Демеу» корпоративтік қоры және Қазақстан қаржыгерлер қауымдастығының өкілдері кірді.

Олимпиаданың өткізілуі академиялық және кәсіби қауымдастық үшін маңызды оқиға болып, студенттердің кәсіби құзыреттерін дамытуға, тәжірибе алмасуға және еліміздің жетекші жоғары оқу орындары мен қаржы секторы өкілдері арасындағы ынтымақтастықты нығайтуға ықпал етті.